កណ្ដាល៖ បុរសជាប្ដីម្នាក់ត្រូវបានកម្លាំងនគរបាលស្រុកស្អាងឃាត់ខ្លួន បន្ទាប់ពីធ្វើសកម្មភាពគំរាមកំហែងសម្លាប់ប្រពន្ធនិងកូន ព្រមទាំងបំផ្លិចបំផ្លាញទ្រព្យសម្បត្តិនៅក្នុងផ្ទះ ខណៈដែលជនសង្ស័យរូបនេះក៏មានសារធាតុញៀនក្នុងខ្លួនផងដែរ។ ហេតុការណ៍នេះបានកើតឡើងនៅថ្ងៃទី១១ សីហា ២០២៥ វេលាម៉ោង ២១:៣០នាទី នៅភូមិព្រែកថ្មី ឃុំទឹកវិល ស្រុកស្អាង។
លោកវរសេនីយ៍ឯក រស់ ចន្ថា អធិការនគរបាលស្រុកស្អាងបានឲ្យដឹងថា ជនរងគ្រោះឈ្មោះ ធួក តុលា (ស្រី, ៤២ឆ្នាំ) ដែលត្រូវជាប្រពន្ធរបស់ជនសង្ស័យ មិនអាចទ្រាំទ្រនឹងទង្វើរបស់ប្ដីបាន ក៏សម្រេចចិត្តមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកវិល ដើម្បីឲ្យជួយអន្តរាគមន៍។
លោកអធិការបានបន្តថា កន្លងមកជនសង្ស័យឈ្មោះ ហៃ សាយ (ប្រុស, ៣៨ឆ្នាំ) ដែលត្រូវជាប្ដីរបស់ជនរងគ្រោះ គឺជាមនុស្សដែលប្រើប្រាស់គ្រឿងញៀនជាប្រចាំ ហើយតែងតែរករឿងក្រុមគ្រួសារ និងអ្នកជិតខាងជាញឹកញាប់។ នៅថ្ងៃទី១១ សីហា ២០២៥ វេលាម៉ោង ៤:៣០នាទីព្រឹក ក្រោយពេលប្រើប្រាស់គ្រឿងញៀនរួច ជនសង្ស័យបានស្រែកឡូឡាគំរាមកំហែងថានឹងសម្លាប់ជនរងគ្រោះនិងកូនៗ រួចក៏យកច្រវាក់វាយបំផ្លាញទ្រព្យសម្បត្តិនៅក្នុងផ្ទះបណ្ដាលឲ្យខូចខាតអស់មួយចំនួន។ លុះដល់វេលាម៉ោង ២១:៣០នាទីថ្ងៃដដែល ជនសង្ស័យបានស្រែកគំរាមកំហែងរកកាប់សម្លាប់ម្តងទៀត ទើបជនរងគ្រោះទ្រាំលែងបាន ហើយក៏ទៅដាក់ពាក្យបណ្ដឹង។
បន្ទាប់ពីទទួលបានពាក្យបណ្ដឹងភ្លាម កម្លាំងប៉ុស្តិ៍នគរបាលរដ្ឋបាលទឹកវិល បានសហការជាមួយកម្លាំងប៉ុស្តិ៍ព្រែកអំបិល ប៉ុស្តិ៍ព្រែកគយ ប៉ុស្តិ៍ស្អាងភ្នំ និងកម្លាំងព្រហ្មទណ្ឌស្រុក ចុះទៅឃាត់ខ្លួនជនសង្ស័យរួមជាមួយវត្ថុតាងជាច្រវាក់ដែកមួយខ្សែ។ ជនសង្ស័យរូបនេះធ្លាប់ជាប់ពន្ធនាគារខេត្តកណ្ដាល ១លើក រយៈពេល ១ឆ្នាំ ៥ខែ ពីបទធ្វើឲ្យខូចខាតដោយចេតនា និងគំរាមកំហែងថានឹងសម្លាប់ផងដែរ។
បច្ចុប្បន្ន ជនសង្ស័យកំពុងត្រូវបានឃាត់ខ្លួននៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី។
