កណ្ដាល៖ ករណីរំលោភដ៏ឃោរឃៅមួយបានកើតឡើងនៅស្រុកស្អាង ខណៈដែលជនសង្ស័យម្នាក់បានឆ្លៀតឱកាសពេលប្ដីរបស់ជនរងគ្រោះចេញទៅឆ្លុះកង្កែប ហើយបានលួចចូលក្នុងមុងយកកណ្ដៀវមកភ្ជុងកគំរាម រួចចាប់រំលោភរហូតបានសម្រេច។ ហេតុការណ៍នេះបានកើតឡើងនៅថ្ងៃទី១៣ សីហា ២០២៥ វេលាម៉ោង ២:៣០នាទីរំលងអធ្រាត្រ នៅលើផ្ទះរបស់ជនរងគ្រោះ ក្នុងភូមិចុងកោះកើត ឃុំកោះខ្សាច់ទន្លា ស្រុកស្អាង។
លោកវរសេនីយ៍ឯក រស់ ចន្ថា អធិការនគរបាលស្រុកស្អាងបានឲ្យដឹងថា ជនរងគ្រោះមានឈ្មោះ ឃ.វ.ថ. (ស្រី, ២២ឆ្នាំ) មានទីលំនៅក្នុងភូមិឃុំកើតហេតុ។ ចំណែកជនសង្ស័យឈ្មោះ តេង សុខម៉ិញ (ប្រុស, ២៥ឆ្នាំ) ក៏មានទីលំនៅភូមិឃុំជាមួយគ្នាដែរ ហើយមានលទ្ធផលតេស្តទឹកនោមវិជ្ជមាន(+)សារធាតុញៀន។ សមត្ថកិច្ចបានដកហូតវត្ថុតាងជាកណ្ដៀវដងជ័រផ្លែដែកមួយដើម ប្រវែង ២៩សង់ទីម៉ែត្រ។
លោកអធិការបានបន្តថា មុនពេលកើតហេតុ វេលាម៉ោង ២:០០នាទី ប្ដីរបស់ជនរងគ្រោះបានភ្ញាក់ពីដំណេកហើយចេញទៅឆ្លុះកង្កែបនៅតាមមាត់ប្រឡាយ។ នៅវេលាម៉ោង ២:៣០នាទី ជនរងគ្រោះបានភ្ញាក់ហើយរើខ្លួន ស្រាប់តែប៉ះជនសង្ស័យនៅចុងជើង។ ភ្លាមៗនោះ ជនសង្ស័យបានយកផ្លែកណ្ដៀវភ្ជុងកជនរងគ្រោះ ហើយគំរាមថា “កុំឲ្យមាត់ កុំឲ្យស្រែក ប្រយ័ត្នស្លាប់”។ ដោយសារតែភ័យខ្លាច ជនរងគ្រោះមិនហ៊ានស្រែកទេ ហើយជនសង្ស័យក៏បានធ្វើសកម្មភាពចាប់រំលោភបានសម្រេចចំនួន ១ដង រួចក៏ត្រឡប់ទៅផ្ទះរបស់ខ្លួនវិញ។
នៅវេលាម៉ោង ១៥:០០នាទីថ្ងៃដដែល ជនរងគ្រោះបានសម្រេចចិត្តទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកោះខ្សាច់ទន្លា។ ក្រោយទទួលបានពាក្យបណ្ដឹង កម្លាំងប៉ុស្តិ៍បានសហការជាមួយកម្លាំងប្រជាការពារ ចុះទៅឃាត់ខ្លួនជនសង្ស័យរួមទាំងវត្ថុតាងយកមកប៉ុស្តិ៍ដើម្បីសាកសួរ។ នៅចំពោះមុខសមត្ថកិច្ច ជនសង្ស័យបានសារភាពថាខ្លួនពិតជាបានប្រព្រឹត្តដូចការចោទប្រកាន់ពិតប្រាកដមែន។
បច្ចុប្បន្ន ជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី។
