កណ្ដាល៖ កូនស្រីម្នាក់ត្រូវបានកម្លាំងសមត្ថកិច្ចឃាត់ខ្លួន បន្ទាប់ពីប្រើប្រាស់គ្រឿងញៀនរួច ហើយយកដែកកេះដុតផ្ទះខ្លួនឯង រួចបន្តដុតផ្ទះម្ដាយទៀត តែសំណាងល្អសមត្ថកិច្ចចុះអន្តរាគមន៍ជួយពន្លត់បានទាន់ពេល។ ហេតុការណ៍ដ៏កម្រនេះបានកើតឡើងនៅថ្ងៃទី១៩ សីហា ២០២៥ វេលាម៉ោង ១១:០០នាទី នៅភូមិលេខ៥ សង្កាត់ស្វាយរលំ ក្រុងតាខ្មៅ។
លោកវរសេនីយ៍ត្រី ហាក់ សុធិន នាយប៉ុស្តិ៍នគរបាលស្វាយរលំបានប្រាប់ឲ្យដឹងថា ជនសង្ស័យមានឈ្មោះ ឡាច សុគន្ធា (ស្រី, ៣០ឆ្នាំ) ដែលត្រូវជាកូនស្រីបង្កើតរបស់ជនរងគ្រោះឈ្មោះ ប៉ាត់ ហាន (ស្រី, ៥៥ឆ្នាំ)។ ជនសង្ស័យរស់នៅជិតផ្ទះម្ដាយរបស់ខ្លួន ហើយមានលទ្ធផលតេស្តទឹកនោមវិជ្ជមាន(+)សារធាតុញៀន។ សមត្ថកិច្ចបានដកហូតវត្ថុតាងជាដែកកេះហ្គាស់ ១ផងដែរ។
លោកនាយប៉ុស្តិ៍បានបញ្ជាក់ថា នៅមុនពេលកើតហេតុ ជនសង្ស័យបានប្រើប្រាស់ថ្នាំញៀនរួចមានសភាពបែកថ្នាំ និងលែងគ្រប់គ្រងខ្លួនឯងបាន។ គាត់បានយកដែកកេះដុតផ្ទះខ្លួនឯងបណ្ដាលឲ្យឆេះធ្នឹម រនូត និងសម្ភារៈមួយចំនួន។ ក្រោយមក ជនសង្ស័យក៏បានបន្តទៅដុតផ្ទះរបស់ម្ដាយខ្លួនទៀត បណ្ដាលឲ្យដំបូលខាងរោងបាយឆេះអស់មួយចំនួន តែត្រូវបានសមត្ថកិច្ចចុះអន្តរាគមន៍ជួយដងទឹកជះពន្លត់ទាន់ពេលវេលា។
ក្រោយពេលកើតហេតុ ជនរងគ្រោះជាម្ដាយបានដាក់ពាក្យបណ្ដឹងឲ្យសមត្ថកិច្ចឃាត់ខ្លួនកូនស្រី រួមទាំងវត្ថុតាងយកមកសាកសួរ។ នៅចំពោះមុខសមត្ថកិច្ច ជនសង្ស័យបានសារភាពថាខ្លួនពិតជាបានប្រព្រឹត្តដូចការចោទប្រកាន់ពិតប្រាកដមែន។
បច្ចុប្បន្ន ជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងតាខ្មៅ ដើម្បីបន្តនីតិវិធីច្បាប់។
