សពជនជាតិនីហ្សេរីយ៉ា ៥នាក់ ដែលស្លាប់ដោយជំងឺផ្សេងៗ ត្រូវបានយកមកបញ្ចុះរួមគ្នានៅស្រុកស្អាង

កណ្ដាល៖ សពជនជាតិនីហ្សេរីយ៉ាចំនួន ៥នាក់ ដែលបានស្លាប់ដោយជំងឺផ្សេងៗ និងត្រូវបានតម្កល់ទុកនៅមន្ទីរពេទ្យក្នុងរាជធានីភ្នំពេញអស់រយៈពេលជាច្រើនឆ្នាំ ត្រូវបានយកមកបញ្ចុះរួមគ្នានៅទីតាំងដីឡូត៍កុងស៊ីមួយកន្លែង។ ហេតុការណ៍នេះបានកើតឡើងនៅថ្ងៃទី៣ ខែកញ្ញា ២០២៥ វេលាម៉ោង ១០:២០នាទី នៅភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្ដាល។

លោកវរសេនីយ៍ទោ ជាវ ប៉ោឡេង អធិការរងផ្នែកការងារអន្តោប្រវេសន៍នៃអធិការដ្ឋាននគរបាលស្រុកស្អាងបានឲ្យដឹងថា សពជនជាតិនីហ្សេរីយ៉ាទាំង ៥នាក់នោះ បានស្លាប់ដោយជំងឺបេះដូង ជំងឺលើសឈាម និងជំងឺរលាកទងសួត ដែលខ្លះបានស្លាប់តាំងពីឆ្នាំ២០១៩ មកម្ល៉េះ។ ដោយសារមិនអាចយកសពទៅប្រទេសកំណើតបាន អាជ្ញាធរ និងក្រុមគ្រួសារបានសម្រេចយកមកបញ្ចុះនៅទីតាំងដីឡូត៍កុងស៊ីមួយកន្លែងសម្រាប់បញ្ចុះសពខ្មែរឥស្លាម ដោយមានការចូលរួមពីអាជ្ញាធរមូលដ្ឋាន សមត្ថកិច្ចផ្នែកអន្តោប្រវេសន៍ស្រុក និងជនបរទេសប្រហែល ៥០នាក់ ដែលមកពីភ្នំពេញជាសាក្សី។

លោកអធិការរងបានបញ្ជាក់បន្ថែមថា សពទាំង ៥នាក់ សុទ្ធតែមានឯកសារបញ្ជាក់ និងលិខិតអនុញ្ញាតឲ្យបញ្ចុះសពយ៉ាងត្រឹមត្រូវពីក្រសួងមហាផ្ទៃ អគ្គស្នងការដ្ឋាននគរបាលជាតិ រដ្ឋបាលរាជធានីភ្នំពេញ និងមន្ទីរសុខាភិបាល។

សពទាំង ៥នាក់នោះរួមមាន៖ ឈ្មោះ NWACHUKWU ISSAC CHIKA (៤៩ឆ្នាំ), ឈ្មោះ ACHUGAH MICHAE CCHINED (៤៦ឆ្នាំ), ឈ្មោះ IKE CHCHUKW (៤៦ឆ្នាំ), ឈ្មោះ ATUEGBU CHINENYE BABASI (៥៣ឆ្នាំ) និងឈ្មោះ JACOB ONYEDINMA CHIGOZIE (៤៧ឆ្នាំ)៕