(ភ្នំពេញ)៖ សម្តេចតេជោ ហ៊ុន សែន បានគូសបញ្ជាក់យ៉ាងច្បាស់ៗនៅព្រឹកថ្ងៃទី៩ ខែធ្នូ ឆ្នាំ២០២៥ នេះថា កងកម្លាំងកម្ពុជាបានបើកការវាយតបតទៅលើកងទ័ពឈ្លានពានវិញហើយ ចាប់តាំងពីល្ងាចម្សិលមិញរហូតមកដល់ព្រឹកនេះ បន្ទាប់ពីកម្ពុជាបានព្យាយាមអត់ធ្មត់គោរពបទឈប់បាញ់អស់រយៈពេលជាង ២៤ម៉ោង ដើម្បីទុកពេលវេលាជម្លៀសប្រជាពលរដ្ឋទៅកាន់តំបន់មានសុវត្ថិភាព។
តាមរយៈសារនយោបាយដ៏សំខាន់នេះ សម្តេចតេជោ បានសង្កត់ធ្ងន់ថា ទោះបីជាកម្ពុជាស្រឡាញ់ និងត្រូវការសន្តិភាពជាចាំបាច់ក្តី ប៉ុន្តែក្នុងស្ថានភាពនេះ កម្ពុជាគ្មានជម្រើសអ្វីក្រៅពីបង្ខំចិត្តកាន់អាវុធវាយតបត ដើម្បីការពារបូរណភាពទឹកដីរបស់ខ្លួននោះទេ។
សម្តេចតេជោ បានមានប្រសាសន៍ថា៖ «ក្រោយការអត់ធ្មត់លើស ២៤ម៉ោង ដើម្បីគោរពនូវបទឈប់បាញ់ និងត្រូវការពេលវេលា ដើម្បីជម្លៀសប្រជាជនចេញមកតំបន់សុវត្ថិភាព។ ល្ងាចម្សិលមិញយើងបានតបតបន្ថែម ដោយយប់មិញ និងព្រឹកនេះ»។
ពាក់ព័ន្ធនឹងការប្រកាសរបស់ លោក អនុធីន នាយករដ្ឋមន្ត្រីថៃ ដែលថាមានផែនការប្រើកម្លាំងវាយយក ១១ចំណុចនោះ សម្តេចតេជោ បានចេញបញ្ជាត្រឡប់ទៅវិញយ៉ាងម៉ឺងម៉ាត់ថា ដោយសារយើងមិនដឹងច្បាស់ថា ១១ចំណុចនោះនៅត្រង់ណាខ្លះ ដូច្នេះដើម្បីកុំឲ្យលំបាករក កងកម្លាំងប្រដាប់អាវុធកម្ពុជាត្រូវតែវាយកម្ទេចគ្រប់ចំណុចដែលខ្មាំងហ៊ានវាយចូលមក។
សម្តេចបានលើកឡើងពីយុទ្ធសាស្ត្រយោធាថា កម្ពុជាមានប្រៀបជាងត្រង់ចំណុចការពារទឹកដី ដោយមានលេណដ្ឋានរឹងមាំ និងអាវុធគ្រប់ដៃ។ ចំណែកឯសត្រូវដែលជាអ្នកឈ្លានពាន ត្រូវចល័តទ័ពចូលមកវាយទីតាំងយើង គឺមិនអាចលីលេណដ្ឋានមកជាមួយបានទេ ហើយក្បាលរបស់ពួកគេក៏មិនបានស្រោបដែកដែរ។ ស្ថានភាពនេះ ផ្តល់ឱកាសឲ្យកម្ពុជាអនុវត្តយុទ្ធវិធីកម្ទេចកម្លាំងរស់របស់សត្រូវ តាមរយៈការរៀបចំកម្លាំងទប់ទល់។
ឆ្លើយតបទៅនឹងសម្តីរបស់មេទ័ពថៃ ដែលបានប្រកាសក្តែងៗថា «ដើម្បីសន្តិសុខប្រជាជនថៃ ត្រូវបំផ្លាញសមត្ថភាពកម្លាំងការពារជាតិរបស់កម្ពុជាសម្រាប់រយៈពេលវែង» នោះ សម្តេចតេជោ បានចំអកថា សម្តីនេះហាក់បីដូចជាខ្លាំងជាងមហាអំណាចយោធាលើពិភពលោកទៅទៀត។ សម្តេចបញ្ជាក់ថា កម្ពុជាពិតជាមិនអាចអង្គុយឱបដៃ មើលបំណងប្រាថ្នារបស់ពួកគេមកបំផ្លាញជាតិយើងតាមចិត្តចង់បានឡើយ។
ជាចុងក្រោយ សម្តេចតេជោ ក៏បានផ្ញើសារទៅកាន់ក្រុមអ្នករិះគន់មួយចំនួនដែលតែងតែចាំចាប់កំហុសថា៖ «ខ្ញុំកំពុងតាមមើលមនុស្សមួយចំនួន ដែលកាលពីកម្ពុជាតបតដើម្បីការពារខ្លួនកាលពីខែកក្កដា ពួកគេចោទយើងថាល្មោភសង្គ្រាម។ ពេលយើងអត់ធ្មត់គោរពបទឈប់បាញ់ និងចង់ដោះស្រាយដោយសន្តិវិធី គេចោទយើងថាខ្លាចថៃ មិនហ៊ានវាយ ឬកាត់ដីឲ្យថៃដើម្បីដូរយកសន្តិភាព។ ពេលនេះយើងវាយដើម្បីការពារខ្លួនទៀតហើយ តើពួកគេនឹងនិយាយថាយ៉ាងម៉េចទៀត? កម្ពុជាត្រូវការសន្តិភាព តែកម្ពុជាបង្ខំចិត្តវាយតបតដើម្បីការពារទឹកដីយើង»៕
