Close Menu
The Real NewsThe Real News
    Facebook YouTube Telegram
    The Real NewsThe Real News
    • ទំព័រដើម
    • ព័ត៌មានជាតិ
    • សន្តិសុខសង្គម
    • អន្តរជាតិ
    • កីឡា
    • សុខភាព
    • វីដេអូ
    The Real NewsThe Real News
    Home » ករណីនិស្សិតស្រីឆ្នាំទី២ស្លាប់ទាំងវ័យ២០ឆ្នាំ ឪពុកអះអាងថាកូនធ្ងន់ធ្ងរដាច់ខ្យល់ស្លាប់តាមផ្លូវ តែមន្ទីរសុខាភិបាលខេត្តកណ្ដាលបំភ្លឺថា អ្នកជំងឺដើរចូលឡានធម្មតា និងស្លាប់នៅមន្ទីរពេទ្យកាល់ម៉ែតទៅវិញ!
    សន្តិសុខសង្គម

    ករណីនិស្សិតស្រីឆ្នាំទី២ស្លាប់ទាំងវ័យ២០ឆ្នាំ ឪពុកអះអាងថាកូនធ្ងន់ធ្ងរដាច់ខ្យល់ស្លាប់តាមផ្លូវ តែមន្ទីរសុខាភិបាលខេត្តកណ្ដាលបំភ្លឺថា អ្នកជំងឺដើរចូលឡានធម្មតា និងស្លាប់នៅមន្ទីរពេទ្យកាល់ម៉ែតទៅវិញ!

    October 19, 20264 ViewsNo Comments2 Mins Read
    Facebook Telegram Pinterest LinkedIn Email
    Share
    Telegram Facebook WhatsApp Pinterest Twitter Email Copy Link

    រឿងរ៉ាវនិស្សិតស្រីឆ្នាំទី២ម្នាក់ ដែលបានបាត់បង់ជីវិតទាំងវ័យ២០ឆ្នាំ ក្រោយចូលព្យាបាលនៅគ្លីនិកឯកជនអស់២យប់៣ថ្ងៃ ពេលនេះបានលេចចេញនូវចំណុចខ្វែងគ្នាដ៏រសើប រវាងការអះអាងរបស់ឪពុកសព និងលទ្ធផលស្រាវជ្រាវរបស់មន្ទីរសុខាភិបាលខេត្តកណ្ដាល។ ឪពុកសពអះអាងថាកូនស្រីមានអាការៈធ្ងន់ធ្ងរ រហូតដាច់ខ្យល់ស្លាប់តាមផ្លូវពេលដឹកត្រឡប់មកផ្ទះវិញ ប៉ុន្តែមន្ទីរសុខាភិបាលបំភ្លឺថា អ្នកជំងឺបានដើរចូលឡានផ្ទាល់ខ្លួនជាធម្មតា ហើយបានស្លាប់នៅក្នុងមន្ទីរពេទ្យកាល់ម៉ែតទៅវិញ។

    ហេតុការណ៍ដ៏គួរឱ្យសោកស្ដាយនេះ បានកើតឡើងលើជនរងគ្រោះឈ្មោះ ប៉ាត់ លីអ៊័រ ភេទស្រី អាយុ២០ឆ្នាំ ជានិស្សិតឆ្នាំទី២ រស់នៅភូមិកំពង់ចំលង ឃុំកំពង់ចំលង ស្រុកខ្សាច់កណ្ដាល ខេត្តកណ្ដាល។

    បើតាមការរៀបរាប់របស់ឪពុកជនរងគ្រោះ បានឱ្យដឹងថា ដំបូងឡើយ កូនស្រីរបស់គាត់មានអាការៈក្ដៅខ្លួននៅផ្ទះរយៈពេល៣ថ្ងៃមកហើយ។ លុះដល់ថ្ងៃទី៨ ខែតុលា ឆ្នាំ២០២៦ គាត់ក៏បាននាំកូនស្រីទៅពិគ្រោះជំងឺនៅ មន្ទីរសម្រាកព្យាបាល ថុន សីហា ដែលមានទីតាំងនៅក្នុងភូមិឃុំខាងលើជាមួយគ្នា។

    ឪពុកជនរងគ្រោះបន្តថា ពេលទៅដល់ ប្រពន្ធរបស់គ្រូពេទ្យ និងបុគ្គលិកពេទ្យ បានធ្វើការពិនិត្យភ្លាមៗ ដោយបញ្ជាក់ថាកូនស្រីរបស់គាត់មានជំងឺគ្រុនឈាម។ បន្ទាប់មក ខាងគ្លីនិកក៏តម្រូវឱ្យអ្នកជំងឺសម្រាកនៅទីនោះ រួចចាប់ផ្ដើមចាក់ថ្នាំ និងដាក់សេរ៉ូមជាបន្តបន្ទាប់។ ប៉ុន្តែក្រោយពេលដាក់សេរ៉ូម អាការៈអ្នកជំងឺបែរជាវិវត្តទៅជាធ្ងន់ធ្ងរពី១ថ្ងៃទៅ១ថ្ងៃ ក្នុងអំឡុងពេលសម្រាកព្យាបាល២យប់៣ថ្ងៃនោះ។ អ្នកជំងឺមានអាការៈក្អួតផង និងធ្លាក់ឈាមផង ដែលខណៈពេលនោះ ឪពុកស្មានថាកូនស្រីមករដូវ។

    ក្រោយឃើញអាការៈអ្នកជំងឺវិវត្តទៅជាធ្ងន់ធ្ងរដូច្នេះ នៅព្រលប់ថ្ងៃទី១០ ខែតុលា ឆ្នាំ២០២៦ ម្ចាស់មន្ទីរសម្រាកព្យាបាល ថុន សីហា ក៏បានប្រាប់ក្រុមគ្រួសារឱ្យបញ្ជូនអ្នកជំងឺទៅសង្គ្រោះបន្តនៅរាជធានីភ្នំពេញ។ ខណៈពេលនោះ ម្ចាស់គ្លីនិកបែរជាដោះសេរ៉ូមចេញពីដៃអ្នកជំងឺ រួចទើបប្រាប់ឪពុកឱ្យបញ្ជូនកូនស្រីទៅមន្ទីរពេទ្យកាល់ម៉ែត តាមរថយន្តផ្ទាល់ខ្លួនរបស់ឪពុកអ្នកជំងឺផ្ទាល់។

    ឪពុកអ្នកជំងឺបានលើកឡើងទៀតថា គ្លីនិក ថុន សីហា បានព្យាបាលកូនស្រីគាត់ពីជំងឺស្រាលទៅជាធ្ងន់ធ្ងរហើយ ថែមទាំងដោះសេរ៉ូមចេញពេលបញ្ជូនទៅសង្គ្រោះបន្តនៅភ្នំពេញទៀត ដែលបណ្ដាលឱ្យអ្នកជំងឺដាច់ថ្នាំអស់ជាច្រើនម៉ោង។ គួបផ្សំនឹងមធ្យោបាយបញ្ជូននោះពុំមែនជារថយន្តសាម៉ុយពេទ្យ ទើបគ្មានបុគ្គលិកពេទ្យ គ្មានសម្ភារៈវេជ្ជសាស្ត្រ និងគ្មានឧបករណ៍សង្គ្រោះមកជាមួយ ដើម្បីជួយសង្គ្រោះបឋមតាមផ្លូវឡើយ។

    តាមសម្ដីឪពុកជនរងគ្រោះ កត្តាទាំងនេះហើយ ទើបជាហេតុនាំឱ្យកម្លាំងអ្នកជំងឺចុះខ្សោយ និងត្រដរខ្យល់ នៅពេលបញ្ជូនទៅដល់មន្ទីរពេទ្យកាល់ម៉ែត នាយប់ថ្ងៃទី១០ ខែតុលា ឆ្នាំ២០២៦។ ភ្លាមៗនោះ ក្រុមគ្រូពេទ្យនៅមន្ទីរពេទ្យកាល់ម៉ែត បានធ្វើការពិនិត្យ និងជួយសង្គ្រោះបឋម។ បន្ទាប់មក គ្រូពេទ្យក៏បានប្រាប់មកក្រុមគ្រួសារថា អ្នកជំងឺមានអាការៈធ្ងន់ណាស់ និងជ្រុលពេលទៅហើយ មិនអាចជួយសង្គ្រោះបានទេ ពោលគឺបើទុកនៅពេទ្យក៏ស្លាប់ បញ្ជូនទៅផ្ទះក៏ស្លាប់ដែរ។ ក្រោយស្ដាប់គ្រូពេទ្យពន្យល់បែបនេះ នៅព្រឹកថ្ងៃទី១១ ខែតុលា ឆ្នាំ២០២៦ ក្រុមគ្រួសារក៏សម្រេចចិត្តឱ្យរថយន្តសាម៉ុយពេទ្យ ដឹកនាងត្រឡប់មកផ្ទះវិញ។ ជាអកុសល យុវតី ប៉ាត់ លីអ៊័រ ក៏បានដាច់ខ្យល់ស្លាប់តាមផ្លូវ មុនពេលមកដល់ផ្ទះ។

    សូមបញ្ជាក់ថា ខ្លឹមសារទាំងអស់ខាងលើនេះ គឺជាការដកស្រង់ចេញពីសម្ដីរបស់ឪពុកជនរងគ្រោះតែប៉ុណ្ណោះ។ ដោយឡែក ដើម្បីឱ្យព័ត៌មាននេះមានតុល្យភាព អង្គភាពសារព័ត៌មានយើងក៏បានព្យាយាមទូរស័ព្ទទៅកាន់ម្ចាស់ទីតាំងមន្ទីរសម្រាកព្យាបាល ថុន សីហា ជាច្រើនលើកផងដែរ ប៉ុន្តែមិនមានការលើកទទួលនោះទេ។

    ងាកមកមើលលទ្ធផលនៃការចុះស្រាវជ្រាវរបស់មន្ត្រីជំនាញជុំវិញរឿងរ៉ាវនេះវិញ កាលពីដំបូងឡើយ លោក គាម ពិសិដ្ឋ ប្រធានមន្ទីរសុខាភិបាលខេត្តកណ្ដាលស្ដីទី បានបញ្ជាក់ប្រាប់អង្គភាពសារព័ត៌មានយើងថា បច្ចុប្បន្ន ក្រុមការងារចម្រុះរបស់រដ្ឋបាលខេត្ត និងមន្ទីរសុខាភិបាល បានចុះពិនិត្យករណីនេះហើយ។ ចំណែកលទ្ធផលយ៉ាងណានោះ រង់ចាំមន្ត្រីរាយការណ៍មកលោកសិន ទើបលោកបញ្ជាក់ប្រាប់នៅពេលក្រោយ។

    រហូតដល់ថ្ងៃទី១៨ ខែតុលា ឆ្នាំ២០២៦ មន្ទីរសុខាភិបាលនៃរដ្ឋបាលខេត្តកណ្ដាល បានសហការជាមួយរដ្ឋបាលស្រុកខ្សាច់កណ្ដាល ចុះអង្កេតស្រាវជ្រាវផ្ទាល់ដល់មន្ទីរសម្រាកព្យាបាល ថុន សីហា និងចុះសាកសួរក្រុមគ្រួសារសព។ បន្ទាប់មក មន្ទីរក៏បានចេញសេចក្ដីបំភ្លឺបង្ហាញពីលទ្ធផលនៃការស្រាវជ្រាវ។ ក្នុងនោះ មន្ទីរសុខាភិបាលបានបញ្ជាក់ថា មន្ទីរសម្រាកព្យាបាល ថុន សីហា គឺដំណើរការដោយមានលិខិតអនុញ្ញាតពីក្រសួងសុខាភិបាលត្រឹមត្រូវ។ រីឯលោកវេជ្ជបណ្ឌិត ថុន សីហា ដែលជាម្ចាស់ទីតាំង និងជាអ្នកព្យាបាលអ្នកជំងឺផ្ទាល់ ក៏មានអាជ្ញាបណ្ណពីក្រុមប្រឹក្សាគណៈគ្រូពេទ្យជាតិ ដែលមានសុពលភាពរហូតដល់ដាច់ឆ្នាំ២០២៦ផងដែរ។

    ចំពោះដំណើររឿងនៃការព្យាបាលវិញ មន្ទីរសុខាភិបាលបានឱ្យដឹងថា កាលពីថ្ងៃទី៨ ខែតុលា ឆ្នាំ២០២៦ វេលាម៉ោង៧ព្រឹក យុវតី ប៉ាត់ លីអ៊័រ អាយុ២០ឆ្នាំ បានចូលមកទទួលការព្យាបាលនៅមន្ទីរសម្រាកព្យាបាល ថុន សីហា ក្នុងឃុំកំពង់ចំលង ដោយមានអាការៈក្ដៅខ្លួន ឈឺក្បាល ឈឺក និងឆ្អល់ចុងដង្ហើម។ ក្នុងអំឡុងពេលស្នាក់នៅព្យាបាល ក្រុមគ្រូពេទ្យបានតាមដានសញ្ញាជីវិតអ្នកជំងឺជាប្រចាំ ព្រមទាំងបានផ្ដល់សេរ៉ូម និងថ្នាំចាក់មួយចំនួន។ រហូតដល់ថ្ងៃទី៩ ខែតុលា ឆ្នាំ២០២៦ គ្រូពេទ្យបានពិនិត្យឈាមលើកទី២ ទើបរកឃើញលទ្ធផលវិជ្ជមាន អិនអេសវမ်း ដែលបញ្ជាក់ថានាងមានជំងឺគ្រុនឈាម។ ការរកឃើញនេះ គឺបន្ទាប់ពីធ្វើតេស្តនៅថ្ងៃដំបូងឃើញអវិជ្ជមាន ហើយគ្រូពេទ្យក៏បានបន្តការព្យាបាលទៀត។

    លទ្ធផលស្រាវជ្រាវដដែលបានបង្ហាញទៀតថា នៅព្រឹកថ្ងៃទី១០ ខែតុលា ឆ្នាំ២០២៦ ស្ថានភាពអ្នកជំងឺមិនមានការប្រែប្រួលឡើយ រហូតដល់ម៉ោង១៥និង៣០នាទីរសៀល អ្នកជំងឺក៏ចាប់ផ្ដើមមានឈាមរដូវ។ ឃើញដូច្នេះ ក្រុមគ្រូពេទ្យបានពន្យល់ពីកត្តាហានិភ័យ ដែលអាចកើតមានសម្រាប់អ្នកជំងឺគ្រុនឈាមចំពេលមានរដូវ និងបានណែនាំឱ្យនាងទៅព្យាបាលបន្តនៅរាជធានីភ្នំពេញ។ លុះដល់ម៉ោង១៨និង៣០នាទីល្ងាច ក្រុមគ្រួសារក៏បានយល់ព្រមយកអ្នកជំងឺទៅព្យាបាលបន្តនៅភ្នំពេញ។ ពេលនោះ ក្រុមគ្រូពេទ្យបានដោះសេរ៉ូមចេញអស់ ហើយអ្នកជំងឺក៏បានដើរចូលរថយន្តផ្ទាល់ខ្លួនជាធម្មតា។

    បន្ថែមលើនេះ តាមរយៈការចុះសាកសួរជីដូនរបស់អ្នកជំងឺ មន្ទីរសុខាភិបាលបានបញ្ជាក់ថា ក្រុមគ្រួសារបានចេញដំណើរពីផ្ទះនៅម៉ោងប្រហែល១៩និង៣០នាទីយប់ ហើយទៅដល់មន្ទីរពេទ្យកាល់ម៉ែតនៅប្រហែល១ម៉ោងក្រោយ។ ពេលទៅដល់ ក្រុមគ្រូពេទ្យនៅមន្ទីរពេទ្យកាល់ម៉ែត បានទទួលចៅស្រីរបស់គាត់ឱ្យចូលសម្រាកនៅបន្ទប់សង្គ្រោះបន្ទាន់។ អ្នកជំងឺបានសម្រាកព្យាបាលរហូតដល់ម៉ោងប្រហែល៦ល្ងាច ថ្ងៃទី១១ ខែតុលា ឆ្នាំ២០២៦ ទើបគ្រូពេទ្យប្រាប់ថាចៅស្រីរបស់គាត់បានស្លាប់ហើយ។

    មន្ទីរសុខាភិបាលនៃរដ្ឋបាលខេត្តកណ្ដាល បានបញ្ជាក់ថា សម្រាប់ចំណាត់ការបន្ត ឬព័ត៌មានបន្ថែមផ្សេងទៀត មន្ទីរនឹងជូនដំណឹងនៅពេលក្រោយ។

    ក្រោយពីបានស្ដាប់ទាំងការអះអាងរបស់ឪពុកសព និងលទ្ធផលស្រាវជ្រាវរបស់មន្ទីរសុខាភិបាលខេត្តកណ្ដាលរួចហើយ តើបងប្អូនយល់ឃើញយ៉ាងណាដែរជុំវិញករណីនេះ? សូមជួយបញ្ចេញមតិនៅខាងក្រោមវីដេអូ ហើយកុំភ្លេចជួយចែករំលែក និងចុចតាមដានផេករបស់យើងខ្ញុំ ដើម្បីទទួលបានព័ត៌មានថ្មីៗបន្តទៀត៕

    • Facebook 25.6K
    • Telegram 1.1K
    • YouTube 2.2K
    • TikTok 33.7K
    • WhatsApp
    • Twitter
    • Pinterest
    • Instagram

    ដឹរៀលញូស៍ ពិត លឿន ទុកចិត្តបាន នៅពេលណា ទីណាក៏បាន
    អាសយដ្ឋាន៖ សង្កាត់ព្រែកឫស្សី ក្រុងតាខ្មៅ ខេត្តកណ្តាល
    Puch Vannak Publisher 085 566 614
    Run Pisithsothearith Editor-in-Chief 090944445

    © 2026 រក្សាសិទ្ធគ្រប់យ៉ាងដោយ The Real News.

    Type above and press Enter to search. Press Esc to cancel.